好煩惱

老實講，其實我真係唔知呢個係咪我ge興趣。其實人就係唔係好知自己鍾意d咩。你鍾意一樣野之前首先係承應鍾意佢，如果唔係你唔會意識到自己鍾意佢。但係你承應鍾意佢果刻其實唔係鍾意佢。如果你唔同自己講你鍾意某樣野，其實你係意識唔到自己鍾意佢。而且你承應鍾意佢並唔一定係因為你之前已經鍾意佢，或者係果陣因為人生冇咩寄託所以有衝動同自己講呢個就係你ge人生目標，然後就一直呃住自己。不過都唔算係呃，因為其實我都唔係好知真相係咩，或者每個人都需要一個人生目標，不是目標ge內容，而係純粹一個目標啦。

一個人覺得開心，其實都係因為呢兩個原因

第一係得到自己想得到ge野
第二係避免失去佢唔想失去ge野

呢兩句其實唔係廢話黎。你成日都話我想得到d咩野，我想要d咩野。其實你真正想ge唔係果樣野，而係滿足你果個"想"。所以重點係你要"得到"，而唔係果樣野本身。好似有人貪污貪埋d錢驚比人知自己收埋落床下底，你唔會明白點解佢咁蠢，但對佢黎講，果一刻佢只係想得到好多錢，而唔係想擁有好多錢。又好似有人過大海賭錢，你唔明點解佢輸晒個本仲唔收手，係因為佢果一刻已經唔係為左得到最多ge錢，而係為左要贏。

所以滿足是一種追求，追求你一直渴望所得到的。

成日覺得如果有人比一億我，頂多我都係得到果下會開心，買車買樓一直買，習慣左有錢生活之後，除左可能多左份優越感先外，其實應該同之前冇咩分別。

所以好多有錢人自殺，或者係因為佢地已經再冇佢想追求ge野。生活o係完全豐富ge環境中其實係好可怕，因為你做每一個行為已經唔能夠給予佢一個意義。例如一個只向錢看ge人，有一日佢得到好多好多的錢，佢就唔會再明白返工係為左咩，唔返工又係為左d咩，生存係為左d咩，對佢黎講係痛苦。

我唔鍾意行山，因為覺得行上去又行返落黎好傻。但有一次被迫去行，到山頂的時候心裡覺得一陣舒暢，除了因為風景很美，還有的是因為我從起點一口氣就走上去，一步一步的。

得閒冇野做，打多d xanga先~

近排睇緊邱吉爾的黑狗，個作者係精神病理學家，感覺上佢講d野有d吹水~

好似你頭先話左出街食飯，依家又話返屋企食，反映出一種後期人格分裂的特殊表徵，其實好明顯你係患左憂鬱症。而且文章中你多次提到你話要返屋企食飯，顯示一種強烈的戀母情結一直困擾住你，主要是因為童年時期對母親的畸形投射所引起，根據佛洛依德初期發表的...

成本書差唔多就係咁，讀落去覺得有d唔客觀，但又證明唔到佢錯咁。不過有個point幾正，講到牛頓果陣，佢指出孤獨是培養抽象心靈的有利因素(大約係咁，exactly果句唔記得)。睇完之後恍然大悟，哦！唔怪得我咁摺啦。
－－－－

團契分組有人分享到我地同d低form ge弟兄唔係好熟(佢成日分享呢個point)，其實都係。所以BBQ果陣都去認識下佢地，發覺細個ge弟兄好似好有天賦咁。有d會考又好多個A，有d又識玩好多樣野咁。如果佢地用呢d才華去追求神，將來真係不得了喎~

好耐冇打xanga lu，愈黎愈唔想打～

o係令會入面都有好多反思~
其實呢一年靈性差左好多，教會照返，福音照傳，你唔分享真係冇人知你靈性係點。我信主到依家印象中好似冇咩試過冇靈修，但係最大獲就係我靈性唔好都會靈修的，feel到自己好似有少少修道主義咁，所以唔可以憑我有冇靈修判決我靈性好唔好。生命有幾敗壞只有神知道，呢一年好似多左好多罪咁。始終靈性係一種關係吧，希望今年會做得好ｄ。

令會立志今年立志多讀聖經，殷勤一點。講真成日話主日學班邊個同邊個好熟聖經，其實我地個form講讀書成績其實同人地差唔多，冇理由讀聖經又咁弱雞。其實係自己花得太少時間姐。

我仲記得上年立志學習信心的功課。講真，令會真係唔好亂立志，真心立志神一定會聽禱告的。所以上年ge經歷真係悲哀。有機會分享。

近排放榜，補習女入左poly nursing，老懷安慰。自己個妹竟然全部炒晒咁滯。= ="

一心諗住下個sem take 科論文研究玩下，之後借左本economic growth 黎讀，自修左3日，勁痛苦。點不知今日plan下先知原來唔夠credit讀= ="...最衰果個cc fyp．搞到讀唔到了

www.econphd.net <---有次上forum無意中發現的，入面個graduate textbook幾正，慢慢讀都應該睇得明的～

http://www.urch.com/forums/phd-economics/　<----呢個forum幾正，入面d人勁到痴線,可以問下佢意見。

我覺得好睇，因為佢地之間ge友誼好令人感動。我唔會認為佢地之間ge係愛情，因為我覺得柴九唔係果ｄ願意為愛情放棄一切ge人。但當佢遇上一個知己，一個真朋友ge時侯，就正如佢所講「人生得一知己，死而無憾」，似乎已經超越左佢本來的人生觀。由一開始三弟比人綁架，佢同四奶奶講價果種唯利是圖ge心態，到最後肯放低一切返入城搵四奶奶；由一開始冇錢都要去嫖妓，屢次比海棠引誘犯錯，到最後肯放低海棠同四奶奶去上海，暗示四奶奶o係柴九心入面ge地位已經超越佢對錢，對性ge渴求。一種純粹的友誼，係激烈ge，係超越性ge友誼。

我覺得好睇，因為從來都係老爺娶個狐狸精入門，信晒個狐狸精，並且個老爺一定係昏庸，懦弱ge。點知今次新娶入面果個係忠，大婆先係奸，而且蔣喬都係個明智之人。呢種新鮮配搭其實好難玩，試諗下如果夏雨唔係懦弱無能，家好月圓一定冇得玩。所以蔣喬呢d權威人士多病早死，去維持一個均勢ge權力鬥爭，其實係件無可奈何ge事。

我覺得好睇，因為奸得合理。正如有一幕蔣喬對二奶奶所講：「你點解要去爭呢？鳳儀都話五十幾歲人，就得果一粒仔，所有人生記託都放埋o係個仔生上，就為左佢死爭爛爭，我明白，但係你武仔...」反映蔣喬一定程度上了解大奶奶ge心態。其實必文係長子嫡孫，子承父業都好合理，至少當時ge社會係咁。相反四奶奶其實係身為入侵者ge角色，大奶奶無論為個仔，抑或為自己失寵而報復，其實亦有相當程度ge合理性。

我覺得唔好係：結局果陣o係上海，講佢地收養左個乞丐細路，最後仲影左一張類似全家福ge相。好明顯想暗示佢地之間ge係愛情，有緣無份之下收養個仔組織家庭咁款，完全同之前d劇情唔match，所以我唔相信佢地係愛情。

我覺得最正ge一幕：o係望江樓四奶奶勸柴九繼續做副團練，然後柴九要走，一直穿過大廳，行到樓梯口，柴九回頭望住四奶奶，想起兩槍指住的危險關頭，四奶奶對佢講過果一番話。然後含蓄互望，帶一點尷尬的微笑，講兩句無關痛癢的話，就淡淡地走了。黎耀祥真係幾好戲wor。