今日真係好灰，一開始同左一個人講福音，辯論型，我好蠢咁同佢辯論左成個鐘，但係佢分明係想挑戰，根本冇心聽我講野。然後同左另一個人傾，講左2個鐘，佢一ｄ感覺都冇！講罪講死亡講神ge愛，佢都係笑笑口咁，因為佢聽到麻目晒，好慘，講極都冇反應。

走果陣真係好想喊出黎，中大真係好多人，好多人未信主。好可憐呀！因為忙黎忙去都唔知為乜，前面好多野未做完，要趕pro，要讀書，要上莊，為將來打算。然後出黎做野，然後結婚生仔退休等死。有一日你要死喇，所有野都帶唔走，都冇意義！冇盼望！或者你搵好多錢，好有成就，但係都要面對死亡。並且我地都唔知自己幾時死，咁做咁多野有咩意義呢？有咩價值呢？

人向來掌管唔到自己ge生命，好多人壞脾氣，想唔發嬲都唔得，控制唔到自己，因為罪會束縛人，罪叫人冇自由！唔係你決定自己ge生命，係你ge情慾決定你ge生命，你ge情慾叫你敗壞，叫你明知唔o岩但係唔做唔得，自己覺得o岩ge反而做左出黎。因為引誘太大喇，你控制唔到自己，你做左情慾ge奴隸。有人為左錢，成世人做呀做，日做夜做，做到自己都食唔晒，然後繼續做，然後死。好可憐呀！錢比到佢ge快樂好短暫，大部分時間佢都係痛苦之中！但係佢擺脫唔到唔去做，罪好似一個重擔子壓o係人身上，你日日背住重擔子，日日愁苦，有時候麻目左，又會覺得空虛，因為一切都冇意義！因為我有一日要死！

人有罪喇，唔可以同聖潔ge神一齊！舊約ge好人見到神ge榮光都嚇到成個人伏o係地上，幾乎要死，何況我地呢？人有罪要同神永遠分開，落到地獄裡面。地獄唔係一個要人變態地受皮肉之苦ge地方，而係一個永遠同神分開ge地方，果到ge人充滿仇恨悲慘ge地方。

人死唔係如燈滅，你有靈魂架！你有良心架！你都知道有d事唔o岩，你卻去做。將來點面對審判呢？o係神面前人ge罪句句都供出黎，然後要落地獄！永遠永遠受刑罰。我地每一個人都有罪呀，聖經話人人都有罪呀！應該人人都要落地獄。

但係神好愛我地，佢叫佢ge獨生子代我地死！o係神眼中我地只係塵土咁微小。情形就好似你o係bio lab到愛d細菌，愛到用你個仔去代替佢地死咁！神ge愛好奇妙呀，佢ge愛大到諗唔明白。神要殺我地真係好容易，殺左你之後做返一個更完美ge你，但係佢冇咁做，因為佢顧念你！佢愛你！我細個ge時候好鍾意一隻snoopy，但我成日賴尿o係佢到，洗左好多次我都係咁賴。有一日，我媽媽冇同我講就將隻snoopy公仔掉左，我係咁喊，喊左好耐。媽媽話買返一隻新ge比我，我唔肯，我一定要返果隻。你有冇試過愛一樣野，愛一個人？你愛佢就係因為佢係佢，唔能夠代替。神ge愛就好似咁，佢唔介意你係一隻好污穢ge公仔，佢愛你！佢為你死！聖經話人好似一隻羊離開左羊圈，神係牧羊人，佢有100隻羊，得你一隻走失左，佢就撇下99隻羊去搵你。外面好多柴狼好危險，佢為你受苦，然後佢搵到你，佢就抱你返屋企，因為佢怕你再受傷害了。

主耶穌點為我地死？佢為我地釘十字架！當時最羞恥最低賤ge刑罰！一個最榮耀ge主受最羞恥ge刑罰！人笑佢，玩弄佢，然後釘死佢！左右手各一口釘，兩腳疊埋釘多一口。佢痛苦，但沒有死。神親自將佢擊打而死，耶穌o係十架上同神講：父呀父呀，點解要離棄我呢？點解要離棄我呢？

但係主耶穌三日之後復活喇！佢勝過死亡，因為佢係神。因為人有罪，罪的結局就係死，同神永遠分開。但係耶穌已經代替你死了，代替你受罪ge刑罰，並且佢三日之後復活，勝過死亡。如果你信佢，第日神審判你，講晒你ge罪出黎，你就同神講：我認罪，但係我信耶穌，耶穌已代替我受罪ge刑罰了！你就可以得救！

你願唔願意認罪悔改，求神赦免你ge罪，並且認耶穌做你的主(主人)，唔再做罪ge奴隸呢？